Myfyrwyr Patrwm Arwyneb yn datgelu dyluniadau a grëwyd ar gyfer canmlwyddiant Laura Ashley
Cynhaliodd Coleg Celf Abertawe Prifysgol Cymru Y Drindod Dewi Sant (PCYDDS) arddangosfa o waith myfyrwyr Patrymau Arwyneb a Thecstilau a ddatblygwyd mewn ymateb i friff byw yn y diwydiant gan frand eiconig o Brydain, sef Laura Ashley, i anrhydeddu pen-blwydd eu sylfaenydd yn 100 mlwydd oed.
Mae’r prosiect yn rhan o Laura Ashley: 100 Years of ân Icon, ymgyrch canmlwyddiant y brand a fydd yn para blwyddyn i ddathlu bywyd ac etifeddiaeth y dylunydd a anwyd yng Nghymru. Yn rhan o’r dathliadau, gweithiodd y cwmni mewn partneriaeth â Choleg Celf Abertawe, gan wahodd myfyrwyr Patrwm Arwyneb a Thecstilau i ymateb i friff a ysbrydolwyd gan ei archifau yn Llundain, y gwnaethant ymweld â nhw yn gynharach yn y broses. Heriodd y briff y myfyrwyr i greu casgliad newydd dychmygus wedi’i ysbrydoli gan yr archif, a’i siapio gan eu gweledigaeth greadigol eu hunain.
Roedd gweithio i friff byw a osodwyd gan un o frandiau cartref a ffordd o fyw mwyaf adnabyddus Prydain yn rhoi mewnwelediad amhrisiadwy i fyfyrwyr i ddisgwyliadau dylunio proffesiynol – o ymchwil dylunio a datblygu cysyniadau hyd at fireinio gwaith celf i’w gyflwyno.
Ar 3 Chwefror, ymwelodd cynrychiolwyr o Laura Ashley â Choleg Celf Abertawe i adolygu casgliadau’r myfyrwyr, gan roi cyfle iddynt gyflwyno eu gwaith yn uniongyrchol i dimau dylunio a marchnata’r brand, a derbyn adborth proffesiynol.
Creodd y myfyrwyr ystod o ddyluniadau, o ddehongliadau cyfoes o flodau nodweddiadol Laura Ashley i ailadrodd patrymau mewn ffordd feiddgar, gan gynhyrchu darnau ar gyfer addurniadau mewnol a chynnyrch y cartref fel papurau wal, teils a ffabrigau, yn ogystal â chysyniadau ar gyfer dillad merched. Roedd pob casgliad yn defnyddio treftadaeth y brand yn ysbrydoliaeth wrth gyflwyno ymagweddau ffres, blaengar at liw, patrwm ac adrodd straeon.
Cafodd Sarah Davies, myfyrwraig yn y drydedd flwyddyn, ei henwi’n enillydd, ac fe dderbyniodd hamper Laura Ashley a chyfle unigryw gyda’r cwmni i gael ei mentora. Mae ei chasgliad, Rhamant y Rhaglywiaeth (‘Regency Romance’), yn defnyddio dyfrlliwiau wedi’u paentio â llaw a ddatblygwyd yn batrymau digidol i greu dyluniadau chwareus, neoglasurol ar gyfer gorchuddion wal, tecstilau a chynnyrch cartref moethus.
Wrth siarad am ei phrofiad o weithio ar y briff byw hwn, dywedodd Sarah: “Buodd hwn yn brofiad amhrisiadwy, a alluogodd i mi gymhwyso fy sgiliau mewn lleoliad proffesiynol a chael mewnwelediad i ddisgwyliadau’r diwydiant.
“Trwy weithio gyda brand enwog fel Laura Ashley amlygwyd y ffordd mae cysylltiadau cryf y cwrs â diwydiant, a’r profiadau cysylltiedig, yn cefnogi myfyrwyr wrth baratoi ar gyfer llwyddiant yn y dyfodol, yn magu hyder ac yn darparu profiad hanfodol yn y byd go iawn.”
Dywedodd Helen Ashmore, Pennaeth Dylunio ar gyfer y Cartref a Ffasiwn yn Laura Ashley:
“Yn wir, cawsom ein hysbrydoli gan safon y gwaith gan bob myfyriwr, ond roedd casgliad Sarah yn sefyll allan am y ffordd yr oedd cadw at y brand ac yn hollol o’r foment. Roedd ei hymateb yn dangos rhywbeth ffres a pherthnasol yn ddiwylliannol, ac rydym yn gyffrous i’w mentora mewn pa bynnag ffordd y bydd hi’n ei dewis - o arweiniad gyda’i phortffolio i lywio disgwyliadau’r diwydiant.
“Mae ein cysylltiad â Choleg Celf Abertawe yn teimlo’n arbennig o ystyrlon o ystyried gwreiddiau Cymreig Laura Ashley, ac mae wedi bod yn hyfryd gweld y berthynas hon yn tyfu. Rydym yn ystyried y tîm a’r myfyrwyr yn rhan o’n teulu creadigol estynedig nawr, ac edrychwn ymlaen at barhau â’r bartneriaeth hon - gan gynnwys gweld pawb yn New Designers yn nes ymlaen eleni.”
Mae’r bartneriaeth gynyddol rhwng Coleg Celf Abertawe a Laura Ashley yn adeiladu ar lwyddiant Anna Eynon, un o’n graddedigion Patrymau Arwyneb a Thecstilau, a ddechreuodd ei pherthynas â’r brand pan enillodd Wobr Ffordd o Fyw Laura Ashley yn New Designers 2024, arddangosfa ddylunio graddedigion fwyaf y DU. Arweiniodd ei hinterniaeth fis gyda’r cwmni at lansio ei chasgliad, The Water’s Edge, yn rhan o’r casgliad AW25 yn siop flaenllaw newydd Laura Ashley yn Thurrock, Essex, a agorwyd yn ystod dathliadau’r canmlwyddiant. Mae cyflawniadau Anna wedi cryfhau cysylltiadau rhwng y brand a’r cwrs Patrymau Arwyneb a Thecstilau, gan helpu i greu cyfleoedd i fyfyrwyr presennol weithio ar eu prosiect eu hunain sy’n canolbwyntio ar y diwydiant.
Anna Eynon (MDes Patrwm Arwyneb a Thecstilau, 2024)
Y gwaith cydweithredol arbennig hwn yw’r diweddaraf mewn cyfres o waith cydweithredol â’r diwydiant sydd wedi’i hymgorffori yn y cwrs Patrymau Arwyneb a Thecstilau. Mae myfyrwyr yn gweithio yn rheolaidd ar friffiau byw sy’n pontio’r ystafell ddosbarth a’r byd proffesiynol. Yn ystod y blynyddoedd diwethaf maent wedi dylunio cysyniadau goleuo ar gyfer Anglepoise , casgliadau print ar gyfer Monki, darluniau ffasiwn ar gyfer H&M, ac wedi cynnig elfennau mewnol moethus ar gyfer Rolls Royce. Mae’r partneriaethau hyn yn galluogi myfyrwyr i adeiladu portffolios proffesiynol cryf, datblygu rhwydweithiau diwydiant, a magu hyder wrth gyflwyno eu syniadau i gleientiaid allanol.
Georgia McKie, Rheolwr Rhaglen ar gyfer Patrwm Arwyneb a Thecstilau
Gyda chyfleoedd i ddysgu gan weithwyr proffesiynol y diwydiant, datblygu sgiliau dylunio yn y byd go iawn a chysylltu â brandiau creadigol blaenllaw, mae myfyrwyr y cwrs Patrymau Arwyneb a Thecstilau yn parhau i elwa o amgylchedd dysgu sydd wedi’i wreiddio mewn arfer proffesiynol. Wrth i’r berthynas â Laura Ashley esblygu, mae’n adlewyrchu ymrwymiad ehangach y brifysgol i baratoi myfyrwyr ar gyfer gyrfaoedd creadigol uchelgeisiol, sy’n barod i’r dyfodol.
Mae PCYDDS yn 1af yng Nghymru ac ymhlith y 5 prifysgol orau yn y DU ar gyfer Ffasiwn a Thecstilau (Tablau Cynghrair y Guardian 2026), gan dynnu sylw pellach at gryfder ei dull addysgu creadigol ac ymagwedd sy’n alinio â’r diwydiant.
Dyma olwg ar rai o gasgliadau terfynol y myfyrwyr:
'A Picnic in the Park' gan Sophie Drew
“Gweithio ar y briff byw hwn gyda Laura Ashley fu uchafbwynt fy amser yn Y Drindod Dewi Sant. Roedd cydweithio â brand byd-eang mor eiconig, un rydw i wedi tyfu i fyny gydag ef, yn gyffrous ac yn ysbrydoledig. Mae wedi cryfhau fy hyder fel dylunydd a bydd yn chwarae rhan allweddol wrth lunio fy ngyrfa yn y dyfodol o fewn y diwydiant.”
'Château's Orchard' gan Lauren Stokes
“Mae gweithio gyda Laura Ashley wedi bod yn brofiad anhygoel. Nid yn unig y mae wedi bod yn gyfle gwych i ychwanegu at ein portffolios o waith, ond rydym wedi gallu derbyn adborth beirniadol gan dîm Laura Ashley ar y gwaith rydym yn ei greu fel pe baem yn gweithio yn eu stiwdio ddylunio.”
'Stitched Together' gan Samantha McGrath
“Mae’r briff byw gyda Laura Ashley wedi bod yn gyfle gwych i brofi sut mae’r diwydiant yn gweithredu, yn ogystal â darparu allbwn gwerthfawr sy’n dangos i gyflogwyr yn y dyfodol ein gallu i weithio o dan derfyn amser wrth fodloni disgwyliadau briff penodol.”
'Ornamental Damask' gan Maja Lane
“Mae wedi fod yn fraint i fod yn rhan o’r prosiect hwn, o ymweld â’r archif i osod ein casgliadau terfynol. Mae’r profiad hwn wedi datblygu fy sgiliau proffesiynol a chreadigol y gallaf eu defnyddio ar gyfer fy nghyflogadwyedd yn y dyfodol.”
'From the Moors' gan Robyn Thorpe
“Rwy wedi mwynhau archwilio dulliau a thechnegau newydd wrth ddylunio ar gyfer brand mor sefydledig a dylanwadol. Rwy’n teimlo bod y prosiect hwn wedi cryfhau fy hyder wrth weithio i ddisgwyliadau’r diwydiant a bydd yn werthfawr iawn wrth fy nghefnogi ar gyfer cyflogaeth yn y dyfodol yn y diwydiant dylunio tecstilau.”
Gwybodaeth Bellach
Mared Anthony
Swyddog Cyfathrebu a Chysylltiadau Cyhoeddus: Cysylltiadau Cyn-fyfyrwyr
Cyfathrebu Corfforaethol a Chysylltiadau Cyhoeddus
E-bost: mared.anthony@pcydds.ac.uk
Ffôn: +447482256996