Taith dysgu gydol oes yn arwain uwch-ddarlithydd PCYDDS at Ddoethuriaeth

Mae’r ddihareb “Nid rhy hen neb i ddysgu” yn cael ei phrofi’n wir gan Dr Nanna Ryder, uwch-ddarlithydd addysg ym Mhrifysgol Cymru Y Drindod Dewi Sant (PCYDDS), a gwraig fferm o Gwmsychbant sydd wedi graddio gyda Doethur mewn Addysg (EdD).

Penderfynodd Nanna ddychwelyd i addysg uwch i astudio gradd mewn Addysg Blynyddoedd Cynnar yng Ngholeg y Drindod, pan roedd yn nesáu at ei phedwardeg oed, ac ar ôl i’w phlant dyfu i fyny. Graddiodd gyda gradd dosbarth cyntaf cyn dychwelyd y flwyddyn ganlynol i gwblhau Tystysgrif Raddedig mewn Addysg Gynradd.

Yn dilyn cyfnod yn gweithio fel athrawes yng Ngheredigion, dychwelodd i PCYDDS fel darlithydd ym maes addysg a chynhwysiant. Ers hynny, mae wedi cyflawni nifer o rolau o fewn y Gyfadran Addysg a Dyniaethau ac mae bellach yn Gyfarwyddwr y rhaglen MA Addysg (Cymru).

Wrth adlewyrchu ar ei thaith academaidd, dywedodd Dr Ryder:

“Rwy’n wirioneddol werthfawrogi pob cyfle mae’r Brifysgol hon wedi’i roi i mi ddatblygu’n broffesiynol ac yn bersonol. Yn sicr, derbyn fy noethuriaeth eleni yw un o uchafbwyntiau fy ngyrfa.  Roedd y cwrs Doethur mewn Addysg yn addas iawn i mi gan fod y strwythur modiwlaidd a’r terfynau amser clir yn gweithio’n dda ochr yn ochr â gwaith llawn amser, bywyd teuluol a gofynion y fferm. Wrth symud ymlaen i’r traethawd hir, byddwn yn sicr wedi rhoi’r gorau iddi oni bai am anogaeth a chefnogaeth ddiflino fy arolygwyr, oedd bob amser yn barod i wrando a rhoi cyngor doeth. Bonws ychwanegol oedd gallu cyflwyno’r gwaith cyfan drwy gyfrwng y Gymraeg.”

Canolbwyntiodd ymchwil Dr Ryder ar les emosiynol a chymdeithasol dysgwyr yng nghyd-destun y Cwricwlwm i Gymru, drwy astudiaeth achos mewn dwy ysgol gynradd.

Ychwanegodd:

“Mae fy nyled yn amhrisiadwy i’r dysgwyr a’r staff a agorodd eu drysau i mi yn ystod cyfnod heriol yn dilyn cyfyngiadau Covid-19. Yn bwysicach fyth, fe wnaethant fy nghroesawu i’w cymunedau a rhannu eu profiadau a’u barn mor onest am les yn yr ystafell ddosbarth.”

Yn dilyn ei seremoni raddio yn Neuadd y Brangwyn, dywedodd Dr Ryder:

“Roedd yn fraint enfawr derbyn fy noethuriaeth heddiw, ac rwy’n hynod ddiolchgar i bawb a’m cefnogodd ar hyd y daith, yn enwedig fy nheulu a’m ffrindiau.  Roedd hefyd yn fraint, fel Cyfarwyddwr y rhaglen MA Addysg (Cymru), cael rhannu’r llwyfan gyda nifer o ymarferwyr addysg oedd yn derbyn eu graddau Meistr. Gobeithio y bydd llawer ohonynt, ymhen rhai blynyddoedd, yn ystyried dilyn yr un llwybr ac ymrestru ar y rhaglen Doethur mewn Addysg.”

Mae stori Nanna yn dyst i werth dysgu gydol oes ac yn enghraifft o sut y gall addysg uwch agor cyfleoedd newydd ar unrhyw adeg mewn bywyd. Mae ei llwyddiant hefyd yn tanlinellu ymrwymiad Prifysgol Cymru y Drindod Dewi Sant i gefnogi dysgwyr ac academyddion i ddatblygu drwy gyfrwng y Gymraeg.

Astudiaeth achos o les emosiynol a chymdeithasol yng nghyd-destun y Cwricwlwm i Gymru mewn dwy ysgol gynradd oedd ffocws ymchwil Nanna.  Ychwanegodd, “ mae fy nyled yn amhrisiadwy i’r dysgwyr a’r staff wnaeth fy ngadael i mewn drwy eu drysau ar gyfnod heriol yn dilyn cyfyngiadau Covid-19, ond yn bennaf am fy ngadael i mewn i’w calonnau hefyd, a rhannu eu barn a’u profiadau mor onest am les ar lawr y dosbarth.” 

Yn dilyn y seremoni raddio yn Neuadd y Brangwyn, dywedodd Nanna:

“Braint i mi oedd derbyn fy noethuriaeth, ac rwy’n hynod o ddiolchgar i bawb wnaeth fy nghynorthwyo, ond yn bennaf i’m teulu a’m ffrindiau am y gefnogaeth er mwyn cyrraedd pen y daith.  Braint hefyd fel cyfarwyddwr y rhaglen MA Addysg (Cymru), oedd cael rhannu’r llwyfan yn y seremoni gyda nifer o ymarferwyr addysg oedd yn derbyn eu gradd Meistr.  Gobeithio mewn rhai blynyddoedd y bydd y rhain hefyd yn ystyried y cwrs Doethuriaeth mewn Addysg”

Gwybodaeth Bellach

Lowri Thomas

Prif Swyddog Cyfathrebu a Chysylltiadau Cyhoeddus      
Cyfathrebu Corfforaethol a Chysylltiadau Cyhoeddus      
E-bost: lowri.thomas@pcydds.ac.uk      
Ffôn: 07449 998476