Myfyriwr yn helpu i lunio diwrnod graddio wrth weithio tuag at ei diwrnod graddio ei hun

Mae Tamara Sanches, sy’n astudio BA Sgiliau Arweinyddiaeth a Rheolaeth ar gyfer y Gweithle ym Mhrifysgol Cymru y Drindod Dewi Sant ac yn Weithredwr Cynllunio Cyfarfodydd a Digwyddiadau yn InterContinental London – The O2, wedi helpu i gyflwyno seremonïau graddio y Brifysgol yn Llundain eleni tra’n gweithio tuag at gwblhau ei gradd ei hun.

I’r mwyafrif o fyfyrwyr, mae diwrnod graddio yn foment y maen nhw’n ei brofi o’r  gynulleidfa neu o’r llwyfan. Fodd bynnag, i un o fyfyrwyr y Drindod Dewi Sant, mae seremonïau graddio eleni yn Llundain yn cynnig persbectif unigryw iddi.

Mae Tamara Sanches, sy’n wreiddiol o Bortiwgal a bellach yn byw yn Llundain, wedi adeiladu gyrfa lwyddiannus yn y diwydiant lletygarwch a digwyddiadau wrth ddilyn ei hastudiaethau yn y Drindod Dewi Sant. Fel Swyddog Gweithredol Cynllunio Cyfarfodydd a Digwyddiadau yn InterContinental London – The O2, mae’n gyfrifol am ddarparu digwyddiadau a chynadleddau mawr, gan gynnwys seremonïau graddio y Drindod Dewi Sant yn Llundain eleni. Gan weithio’n agos gyda thimau o’r brifysgol a’r gwesty, mae Tamara yn chwarae rhan allweddol wrth sicrhau bod y seremonïau yn rhedeg yn esmwyth, gan helpu i ddarparu un o’r dathliadau mwyaf arwyddocaol yng nghalendr y brifysgol.

Dywedodd Tamara: “Mae’n arbennig o ystyrlon oherwydd fy mod hefyd yn fyfyriwr yn y Drindod Dewi Sant. Mae’n rhoi persbectif unigryw i mi, gan fy mod yn deall y gwaith sy’n mynd i drefnu digwyddiad sydd mor arwyddocaol a’r ymdeimlad o gyflawniad a deimlir gan y graddedigion. Mae gwybod y byddaf yn dathlu fy ngraddio fy hun yn fuan yn gwneud hyn hyd yn oed yn fwy arbennig.” 

Dechreuodd ei thaith gyda’r Brifysgol gydag awydd i ategu blynyddoedd o brofiad ymarferol yn y diwydiant gyda gwybodaeth academaidd. Wedi’i gyrru gan angerdd am arweinyddiaeth, busnes ac ymddygiad defnyddwyr, dewisodd ddilyn addysg uwch ochr yn ochr â gyrfa lawn-amser heriol. 

“Mae bob amser wedi bod yn bwysig i mi barhau i ddysgu. Rhoddodd y Drindod Dewi Sant gyfle i mi ddatblygu fy nealltwriaeth o arweinyddiaeth, busnes a rheolaeth wrth barhau i weithio.” 

Cwblhaodd Dystysgrif Addysg Uwch cyn symud ymlaen i’r BA Sgiliau Arweinyddiaeth a Rheolaeth ar gyfer y Gweithle, gan  ddod o hyd i werth uniongyrchol mewn cwrs oedd â chysylltiadau agos â’i chyfrifoldebau o ddydd i ddydd. 

“Mae’r rhaglen wedi fy helpu i feddwl yn fwy strategol, i wella fy ngallu i wneud penderfyniadau ac i ddatblygu fy sgiliau arweinyddiaeth. Yr hyn sydd wedi sefyll allan fwyaf yw’r amgylchedd cefnogol. Er bod y brifysgol yn cynnal safonau academaidd uchel, mae yna ymdeimlad gwirioneddol o gymuned.” 

Mae’r ymdeimlad hwnnw o gymuned wedi bod yn rhan bwysig o’i llwyddiant. Nid yw cydbwyso gyrfa brysur yn y diwydiant digwyddiadau gydag ymrwymiadau academaidd bob amser wedi bod yn hawdd. Mae dyddiadau cau tynn, amserlenni heriol a natur rheolaeth digwyddiadau sy’n symud yn gyflym wedi gofyn am drefnu gofalus a gwytnwch.  

“Mae sgiliau trefnu da, rheoli amser a rhwydwaith cymorth cryf wedi bod yn hanfodol. Mae’r anogaeth gan fy nheulu, fy nghydweithwyr a thîm y Drindod Dewi Sant wedi fy helpu i gynnal fy ffocws a’m cymhelliant trwy gydol y daith.” 

Ar ôl treulio misoedd yn helpu i sicrhau bod pob manylyn o seremonïau graddio eleni yn ei le ar gyfer darpar-raddedigion fel hithau, bydd hi’n cael y cyfle i ddathlu ei chyflawniad ei hun ochr yn ochr â nhw cyn bo hir.  

Wrth iddi edrych tuag at y foment honno, mae ei huchelgeisiau yn parhau i fod yn glir. 

“Ar ôl graddio, yn broffesiynol, rwy’n gobeithio parhau i symud ymlaen i rolau arwain a rheoli lle gallaf gyfuno fy mhrofiad yn y diwydiant â’r wybodaeth rydw i wedi’i hennill trwy fy astudiaethau. Yn fwy na dim, rwy’n gobeithio parhau i ddysgu, ymgymryd â heriau newydd a chael effaith gadarnhaol ar y bobl a’r sefydliadau rwy’n gweithio gyda nhw.” 

Gwybodaeth Bellach

Mared Anthony

Swyddog Cyfathrebu a Chysylltiadau Cyhoeddus: Cysylltiadau Cyn-fyfyrwyr   
Cyfathrebu Corfforaethol a Chysylltiadau Cyhoeddus   
E-bost: mared.anthony@pcydds.ac.uk     
Ffôn: +447482256996