Ysgolion Haf

Rhaglen ysgrifennu ddwys 12 diwrnod ym Mhrifysgol Cymru Y Drindod Dewi Sant, Llanbedr Pont Steffan, Cymru yw Ysgol Haf Dylan Thomas. Fe’i sefydlwyd gan Menna Elfyn yn 2014 ac mae’n cael ei chyfarwyddo ar y cyd gan Pamela Petro a Dominic Williams.

Mae’r cwrs wedi’i strwythuro i adlewyrchu ei bwyslais thematig ar “Ymdeimlad o Le.” Mae wedi’i achredu’n llawn gan Brifysgol Cymru ac mae’n agored i israddedigion, myfyrwyr graddedig, ac aelodau’r cyhoedd. Tua 15 o fyfyrwyr sydd mewn dosbarth fel arfer. 

Bydd maes llafur 2024 yn cynnwys 14 o weithdai ysgrifennu sy’n cael eu haddysgu gan yr awdur rhyddiaith Pamela Petro a’r bardd Samantha Rhydderch, ynghyd â thiwtoriaid gwadd. Daw’r testunau trafod ar gyfer gweithdai o ddarlithoedd, darlleniadau penodedig a gwibdeithiau prynhawn. Rydym yn annog myfyrwyr i wneud cysylltiadau rhwng arsylwadau ar dirwedd a hanes Cymru a’u hatgofion eu hunain o ran “lle” a’u defnyddio fel deunydd crai ar gyfer eu gwaith ysgrifenedig.

Yn 2024, y bwriad yw cynnal teithiau i Ynys Môn, Gerddi Aberglasne, Castell Harlech, Eryri ac i bentref arfordirol Llansteffan, yr ysbrydoliaeth y tu ôl i stori ‘A visit to Grandpa’s’ Dylan Thomas. 

Yn ogystal â’r lleoedd hyn, yn 2024 bydd myfyrwyr yn ymweld â’r ‘Boathouse’, cartref Dylan Thomas yn Nhalacharn, a bydd Ysgol Haf Dylan Thomas yn treulio dau ddiwrnod a thair noson yn Nhŷ Newydd, Canolfan Ysgrifennu Genedlaethol Cymru a chyn gartref y Prif Weinidog David Lloyd George. Ar gampws Llambed, bydd myfyrwyr yn mynd ar daith o amgylch Llyfrgell Roderic Bowen, sy’n cynnwys un o’r casgliadau pwysicaf o lyfrau prin a llawysgrifau canoloesol ym Mhrydain, ac yn cael cynnig mynd ar daith gerdded i fryngaer o’r Oes Haearn.

Bydd ein rhaglen ddrafft o ddarlleniadau nosweithiol gan awduron a beirdd gorau Cymru ar gyfer 2024 yn cynnwys Menna Elfyn, gydag ymddangosiadau tebygol gan Mike Parker, Tom Bullogh a Twm Morys. 

Tuag at ddiwedd y rhaglen, bydd myfyrwyr yn cael tiwtorial 20 munud, un-i-un gyda Pamela Petro neu Dominic Williams i drafod eu gwaith yn breifat. Rhaid i bob myfyriwr sy’n dilyn y cwrs er mwyn derbyn credyd gyflwyno detholiad o gerddi, stori fer, neu draethawd i’w graddio.

Sylwch fod y rhaglen wedi’i chynllunio fel bod yr amser y mae myfyrwyr yn ei dreulio y tu allan i weithdai a seminarau yr un mor bwysig â’r amser a dreulir yn yr ystafell ddosbarth. Mae gwibdeithiau a darlleniadau gan awduron Cymreig yn annog myfyrwyr i greu deunydd na ellid byth ei gynhyrchu yn yr ystafell ddosbarth yn unig.

Addysg Awyr Agored: Mae Materion Damcaniaethol mewn Gweithgareddau Awyr Agored yn gwrs 3 wythnos a fydd yn gyfuniad o theori academaidd a gweithgareddau ymarferol yn yr awyr agored, gan gynnwys heicio, gwersylla, ogofa, canŵio, caiacio, nofio, archwilio mwyngloddiau, dringo creigiau a beicio mynydd. Er bod y gweithgareddau’n ddifyr, maent yn eu hanfod yn fodd o archwilio amrywiaeth o themâu academaidd fel cynaladwyedd, datblygiad personol a chymdeithasol a’r ddeuoliaeth rhwng risg ac antur.